धनंजयास

धनंजय सखाराम डोंगरे

 

जन्मः गुरूवार, दिनांकः १३-१०-१९५५, धनत्रयोदशी,

आश्विन कृष्ण त्रयोदशी, डोंबिवली;

मृत्यूः बुधवार, दिनांकः ३१-०८-२०२२, गणेशचतुर्थी,

भाद्रपद शुद्ध चतुर्थी, कल्याण.

धनंजयास

प्रदीर्घ संघ साधना तुझी कृतार्थ जाहली
कितीक व्यक्ति जोडल्या कितीक माणसे भली ।
तुझेच नाव घेत ते स्मृती खुशाल सांगती
धनंजया सदा स्मरेन साथ सर्व ही तुझी ॥१॥

तुझेच जावई भले तुझी मुले सुना मुली
तुझीच नातवंडही करीत आठवे तुझी ।
मलाहि पाठिशी तुझाच धीर मागता न मी
धनंजया सदा स्मरेन साथ सर्व ही तुझी ॥२॥

खडे कडे चढूनही गिरीस सह्य पाहिले
हिमाद्रि पर्वतात पार्वती नदीस देखले ।
मिळून अंदमानिही समुद्र धुंडले तळी
धनंजया सदा स्मरेन साथ सर्व ही तुझी ॥३॥ 

यथार्थ साथ पत्निही कितीक माणसे तुझी
तुझीच संस्कृती जगात आजही प्रसारती ।
सदा सुहास्य बोलके सहाय्य दे न बोलुनी
धनंजया सदा स्मरेन साथ सर्व ही तुझी ॥४॥

कृतार्थ याद राहिली जरी न राहिलास तू
इथे न राहते कुणी मनात राहिलास तू ।
तिथे तुला मिळो गती सदा सदाच चांगली
धनंजया सदा स्मरेन साथ सर्व ही तुझी ॥५॥ 

 

नरेंद्र गोळे २०२२०८३१